Fullkominn endir

Áramót nálgast og margir að spá í hvaða mat á að bera fram þennan síðasta dag á árinu. Ég er allavega með uppskrift að súkkulaðibúðing........nema hvað. Ég hef verið að þróa þessa uppskrift í nokkurn tíma og setti síðast kartöflumjöl í hann á staðin fyrir hveiti sem var venjan áður. Útkoman var meiriháttar, Mjúka miðjan flauelsmjúk - súkkulaði klikkar ekki.

Gleðilegt nýtt ár !!

Súkkulaðibúðingur með mjúkri miðju

Í svona súkkulaðibúðing þar sem súkkulaði er í aðalhlutverki er atriði að nota gott hreint súkkulaði. Búðingurinn er eins góður og súkkulaðið sem í hann fer !

190 g súkkulaði, vandað 70 %,

180 g smjör

3 egg

3 eggjarauður

6 msk. sykur

3 tsk. kartöflumjöl

Léttþeyttur rjómi eða vanillusósa til að bera fram með

Hitið ofninn í 220°C. 210 á blástur. Smyrjið 6 form með smjöri eða olíu. Það er best að nota form sem taka um 2 dl og fylla þau ekki alveg. Bræðið súkkulaði og smjör saman í vatnsbaði við vægann hita. Þeytið egg , eggjarauður og sykur létt saman, blandan á ekki að vera þeytt í froðu bara létt saman svo hún verði aðeins léttari. Blandið súkkulaðiblöndu út í eggin og sigtið kartöflumjölið yfir. Blandið öllu saman með sleikju og hellið í formin. Bakið búðinginn í 6 mín, tíminn fer svolítið eftir ofnum, gæti þurft 8 mín. Látið búðinginn standa aðeins á borðinu svo hann jafni sig eða setjið hann í ísskáp í 10 mín og hvolfið honum síðan á diska. Berið léttþeyttan rjóma eða kalda vanillusósu fram með búðingnum.

Magnið í þessari uppskrift er alveg nóg fyrir 8 manns eða í í 8 form og þá bara að setja minna í formin. Þá er samt ráð að athuga bökunartímann, hann er styttri, gæti verið um 4-5 mín. Það er líka hægt að nota múffuform (járn) og skipta deiginu í það.

Kalkúnn á áramótum

Þegar kemur að því að elda kalkún treysti ég uppskrift frá sjónvarpsdísinni Nigellu best. Hér áður fyrr urðu bringurnar á kalkúninum oft þurrar og óspennandi hjá okkur og endalausar spekúleringar að láta hann snúa á hvolf við eldunina til að fá eitthvað djús í þessar blessuðu bringur. Ritstjórinn á Gestgjafanum, Sólveig, hafði farið eftir uppskrift úr jólamatreiðslubók Nigellu Lawson fyrir nokkrum árum og mælti mjög með því að við myndum prófa hana. Nigella leggur fuglinn í saltlög svo vatnið í honum bindist kjötinu vel. Síðan þessi uppskrift var prófuð hefur kalkúnnin verið eldaður á þennan hátt hjá okkur og allir mjög ánægðir með hvað hann er allur góður og safaríkur. Á vefsíðu Nigellu nigella.com eru ýtarlegar upplýsingar um ferlið ásamt uppskriftum að meðlæti.

Safaríki kalkúnninn hennar Nigellu

1 kalkúnn, ófrosinn, ( 4-5 kíló) vængstubbar klipptir frá til að nota í sósu

Saltlögur:

6 lítrar vatn

125 g matarsalt

3 msk. svört piparkorn

1 bouquet garni (má sleppa eða nota 3 lárviðarlauf)

2 msk. gul sinnepsfræ (má sleppa)

200 g sykur

2 laukar, gróft skornir

1x 6 cm sneið af fersku engifer, skorið í sneiðar

1 kanelstöng

1 msk. kúmen (má sleppa)

4 negulnaglar

4 stjörnuanís

2 msk. allrahandaber (má sleppa eða nota 4-6 negulnagla í viðbót)

1 appelsína skorin í 4 parta

4 msk. hlynsíróp

4 msk. hunang (má nota annað hvort síróp eða hunang og þá 8 msk.)

Setjið allt sem fer í uppskriftina í hreina skúringafötu eða ílát sem er álíka stórt. Hrærið vel í svo sykurinn og saltið leysist vel upp. Kreistið appelsínurnar til að safinn blandist vökvanum.

Fjarlægið pokann með innmatnum innan úr fuglinum og geymið í kæli og sökkvið kalkúninum í saltlöginn. Látið fuglinn liggja í leginum í einn sólarhring hann má bíða þar í tvo ef það hentar betur. Ef veðrið er gott er upplagt að setja plastpoka yfir fötuna og geyma hann úti til dæmis á svölum.

Þegar kemur að því að steikja fuglinn er best að taka hann úr leginum klukkutíma áður er hann á að fara í ofninn, svo hann sé ekki ískaldur þegar hann fer inn, og þerra hann vel með eldhúspappír eða viskastykki.

Steikingin:

Bræðið saman 75-100 g smjör með 3 msk hlynsíróp. Penslið fuglinn með blöndunni. Nuddið 1-2 msk. kalkúnakryddi ( frá Pottagöldrum) á fuglinn. Bindið leggina á fuglinn saman fremst á leggnum svo lærin standi ekki út í loftið. Hitið ofninn í 220°C . Setjið fuglinn á ofnrist ofan á ofnskúffu. Látið fuglinn steikjast í 30 mín á þessum hita á neðstu rim í ofninum. Lækkið hitann í 180°C og steikið fuglinn áfram í 2 - 2 1/2 klukkutíma. Hækkið hitann í 220°C síðasta korterið ef hann er ekki nógu vel brúnaður. Ef hann brúnast of mikið er gott að leggja álpappír ofan á hann. Það þarf að fylgjast með kalkúninum allan tímann, það er málið við að matreiða svona stóran fugl, það þarf að dekra við hann. Gott er að hella soðinu sem kemur í ofnskúffuna yfir hann annars lagið og líka pensla hann með hlynsírópssmjörinu ef afgangur varð af því.

Sósa:

Brúnið vængstubba, háls og fóarn með smávegis af lauk og gulrótum. Hellið vatni svo fljóti yfir, saltið og piprið og sjóðið í klukkutíma. Sigtið og smakkið til með kjúklinga eða kalkúnakrafti.

Steikið 250 g af sneiddum sveppum ásamt 1 msk. söxuðum lauk í potti. Bætið 3-4 msk. hveiti út í. Bætið soðinu út í smátt og smátt svo ekki fari í kekki. Látið sósuna sjóða áfram í 20-30 mín við jafnan hita og dekrið við hana á meðan með púrtvíni, sjerrý eða því víni sem þið eigið til, vel af nýmöluðum pipar, evtv. kalkúnakryddi, rifsberjahlaupi og smá rjóma í restina. Þegar fuglinn er tilbúinn er gott að hella soðinu sem er í ofnskúffunni í skál, fleyta mest af fitunni ofan af með skeið og hella kjarngóða soðinu af kalkúninum úr í sósuna.

Meðlæti:

Það er mjög mismunandi hvaða meðlæti fólki finnst gott að borða með kalkún. Á mínu heimili var oft gerð brauðfylling og sett inn í fuglinn. Í Bretlandi segja menn að þar sé komin ástæðan fyrir því að fólk fái matareitrun af þessum mat, fyllingin sé ekki nægilega vel elduð innan í fuglinum. Fylling í formi sem kemst í ofninn hjá dýrinu er því kannski best. Ég hef oft mauk með fuglinum. Jafnt mikið af soðnum sætum kartöflum og venjulegum kartöflum maukað saman með smá smjöri er til dæmis mjög gott eða bara hafa soðnar kartöflur. Waldorfsalat passar líka vel með. Annars er þetta smekksatriði og best að velja meðlætið þannig að minnst þurfi að hafa fyrir því á síðustu stundu því það er heimikil fyrirhöfn að elda kalkún en það er skemmtilegt og mjög hátíðlegur matur. Í jólablöðum Gestgjafans eru líka oft góðar uppskriftir að meðlæti.

Tími:

4,5 kg kalkúnn þarf um 2 tíma í ofninum.

5,5 um 2 1/2 tíma

6.5 um 2 3/4 tíma

7.5 um 3 tíma

Þetta fer þó alfarið eftir ofnum, þeir eru misjafnir. Kjöthitamælar eru ekki dýrir og ekki vitlaust að fjárfesta í einum slíkum ef þið eruð óörugg með tímann.

Vanillusósa með eftirréttunum

Það bætir miklu við góða eftirrétti að bera ekta vanillusósu með. Mér finnst súkkulaðikaka með vanillusósu og berjum eða berjasósu algjörlega ómótstæðilegur eftirréttur. Það er pínu vandi að laga vanillusósu, hún fer í drafla ef maður sýður hana of mikið, það þarf að taka hana af hitanum á réttu augnabliki eða um leið og hún byrjar að þykkna. Með því að setja smá kartöflumjöl út í eggjarauðurnar eins og þessi uppskrift hér inniheldur er mun auðveldara að laga sósuna.

Vanillusósa

2 dl mjólk

1 dl rjómi

1 vanillustöng

3 eggjarauður

3 msk. sykur

2 tsk. kartöflumjöl

1/2 - 1 tsk. vanilludropar

Setjið mjólk og rjóma í pott. Kljúfið vanillustöngina í tvennt eftir endilöngu og skafið fræin innan úr. Setjið þau í pottinn ásamt stönginni og hitið mjólkurblandið að suðu. Setjið lok á pottinn og látið þetta standa í 20 mín svo bragðið af vanillunni nái að blandast mjólkurblandinu vel. Sláið eggjarauðurnar, sykurinn og kartöflumjölið saman í skál. Hellið mjólkurblandinu, gegn um sigti, út í rauðurnar og þeytið létt saman. Hellið blöndunni aftur í pottinn og látið suðuna koma upp. Hellið strax í skál. Smakkið til með vanilludropum. Athugið að það er áríðandi að láta sósuna ekki sjóða neitt eftir að suðan er komin upp hún getur farið í drafla, hafið skál tilbúna og hellið henni strax í skál. Kælið sósuna. Vanillusósa er best sama

dag og hún er löguð.

Kakan hans Toni

Þessi jólalega kaka er seld um alla Evrópu í nóvember og desember. Hún á rætur sínar að rekja til Ítalíu og er kennd við bakara sem heitir Toni. Það er lítið mál að baka hana sjálfur, hún verður kannski ekki eins há og sú keypta en mjög bragðgóð ......eins og allt heimabakað.

Panetone

2 1/2 dl volg mjólk

2 tsk. þurrger

400 g hveiti

1/2 tsk. salt

2 eggjrauður

---

2 eggjarauður

70 g sykur

150 g smjör, mjúkt

100 g sultaður appelsínubörkur

100 g rúsínur, gjarnan bæði ljósar og dökkar venjulegar

---

30-40 g smjör, brætt

Setjið mjólk og þurrger í skál og hrærið saman. Bætið hveiti, salti og eggjarauðum út í og hrærið saman í samfellt deig. Látið plastfilmu yfir skálina og látið hefast á hlýjum stað í klukkustund eða í ísskáp yfir nótt.

Setjið bökunarpappír inn á hliðarnar á 20-22 cm smelluformi eins og sýnt er á myndinni. Það er gott að brjóta hann í tvennt og klippa hann til, fínt að nota klemmu til að halda honum í hring.

Hrærið eggjarauður, sykur, smjör, börk og rúsínur saman við deigið. Hnoðið aðeins hveiti saman við svo úr verði samfellt brauðdeig, það verður samt alltaf svolítið klístrað út af smjörinu. Setjið deigið í formið og látið hefast aftur á hlýjum stað í klukkutíma.

Hitið ofninn í 200°C eða 180 á blástur. Bakið brauðið neðst í ofni í 20 mín. lækkið þá ofninn í 180°C eða 160°C á blæstrinum. Bakið áfram í 30 mín. Penslið brauðið með smjöri um leið og þið takið það úr ofninum. Geymist í ísskáp í 2 vikur og má frysta.

Steik ?

Í uppáhalds fiskbúðinni minni, Hafberg í Gnoðavogi, fæst þessa dagana Keila á frábæru verði eða á 1490 kr. kíló, roðlaust og beinlaust. Keila er af þorskætt, er föst í sér, minnir á skötusel eða lúðu og er algjört sælgæti. Þetta er einn af mínum uppáhaldsréttum. Góður fiskur er að mínu mati betri en nokkur steik...............

Keila með linsubaunum

800 g keila, þverskorin í 3 cm þykka bita
2 msk. olía
1 msk. smjör
2 hvítlauksrif, sneidd
sjávarsalt og nýmalaður pipar


300 g brúnar linsubaunir
2-3 msk olía
2 skalotlaukar, saxaðir
2-3 hvítlauksrif, söxuð
3-4 sneiðar parmaskinka, önnur hráskinka eða góð pylsa, skorin í bita
sjávarsalt og nýmalaður pipar
2-3 msk. söxuð fersk steinselja

jómfrúarolía til að bera fram með

Sjóðið linsubaunurnar í 30 mín eða þar til þær eru mjúkar, hellið í sigti. Steikið skalotlauk og hvítlauk þar til hann er mjúkur. Bætið hráskinku út í og steikið aðeins áfram, bætið linsubaunum á pönnuna og hitið vel í gegn. Saltið og piprið og sáldrið steinselju yfir. Haldið heitu á meðan þið steikið fiskinn.

Bræðið smjörklípuna í olíu og steikið hvítlaukinn þar til hann er farinn að taka lit, veiðið hann upp úr og geymið. Steikið Keilubitana á báðum hliðum með skurðsárið niður eins og þið væruð með steik, 2-3 mín á hvorri hlið er passlegt en fer þó eftir þykkt stykkjana, saltið og piprin eftir smekk. Setjið hrauk af linsum á hvern disk eða á fat, raðið keilubitunum ofan á og setjið hvítlaukssneiðarnar ofan á fiskinn. Setjið svolítið af jómfrúarolíu í kring um linsurnar og sáldrið steinselju í kring.

Mömmukökur - besta jólabragð í heimi.

Í mínum huga er fátt jólalegra en mömmukökur. Kryddbragðið af þeim með smjörkreminu er bara yndislegt......Þær eru ekki það fljótlegasta að baka en fyllilega þess virði. Ef ég bakaði bara eina tegund af kökum fyrir jólin er þetta hún.

Mömmukökur

250 g síróp
125 g sykur
1 egg
500 g hveiti
2 tsk. matarsódi
1/2 - 1 tsk. engifer
1 tsk. kanell

Hitið síróp, smjör, og sykur saman í potti þar til allt er bráðið, kælið aðeins. Bætið eggi út í og blandið saman. Sigtið hveiti, matarsóda og krydd saman og bætið út í sykurblönduna. Hrærið saman í samfellt deig. Þetta má allt gera í pottinum. Kælið deigið í 30-60 mín. Hitið ofninn í 175°C eða 165 á blástur. Skiptið deiginu í 4 parta og fletjið einn part í einu út á hveitistráðu borði. Stingið út kringlóttar kökur og raðið á bökunarpappír á ofnplötu. Bakið kökurnar í 6-7 mín, kælið.

Krem:
200 g smjör
200 g flórsykur
1 eggjarauða
2-3 tsk. vanilludropar

Hrærið allt mjög vel saman eða þar til það er ljóst og loftkennt. Leggið kökurnar saman með kreminu. Geymið kökurnar í blikkboxi á svölum stað eða í kæli.

Sjóðheit og krydduð í kuldanum.

Hér er ein uppáhalds uppskrift að frábærri súpu. Krydduð og kjarnmikil og oft elduð hjá mér þessa dagana. Súpur eru yfirleitt ódýr matur, sérstaklega baunasúpur. Ég nota rautt kryddmauk sem ég kaupi til dæmis í Vietnam market á Suðurlandsbraut við hliðina á Nings, 500 kr dósin og dugar í marga mánuði.

Krydduð baunasúpa
fyrir 6

2 msk. olía + 1 msk smjör
2 laukar, saxaðir
2 hvítlauksrif, söxuð
2 gulrætur, saxaðar smátt
4 cm engiferrót, flysjuð og söxuð
1-2 msk. rautt eða grænt karrýmauk (kryddmauk))
150 g rauðar linsubaunir
12 dl vatn+ 1 kubbur grænmetiskraftur
1 dós tómatar eða 4 dl tómatdjús

2-3 dl létt-kókosmjólk

1 tsk. sjávarsalt og nýmalaður pipar

Steikið lauk, hvítlauk og gulrætur góða stund við í olíu og smjöri. Bætið engifer út í og steikið í 1-2 mín og síðan kryddmauki og steikið aðeins saman. Maukið tómata ásamt safanum í dósinni og bætið þeim út í ásamt öllu öðru nema kókosmjólk. Látið þetta malla í 30 mín. Bætið kókosmjólk og salti út í , og smakkið til með pipar. Sjóðið saman í 5 mín. í viðbót. Súpan er sterk og gott að setja slettu af sýrðum rjóma ofan á og/eða ef þið viljið saxaðan vorlauk eða steinselju.

Aðventustemming

Uppskriftin að þessari köku hefur fylgt mér lengi og er í miklu uppáhaldi. Hún er að upplagi af ítölskum ættum og er kölluð "brauð" þar í landi. Í henni eru ristaðar heslihnetur sem er svolítil fyrirhöfn en þegar búið er að rista hneturnar svona eru þær engu líkar og gefa kökunni frábært bragð. Mér finnst hún passa mjög vel sem sunnudagskaka á aðventunnni.

Ávaxtakaka

80 g heslihnetur
250 g smjör, mjúkt
180 g sykur
4 egg
3 msk. sjerrý eða avaxtasafi
1 dl þurrkaðar döðlur, saxaðar
1 dl þurrkaðar fíkjur, saxaðar
1 dl þurrkaðar apríkósur, saxaðar
1 1/2 tsk. vanilludropar
260 g hveiti (pilsbury´s)

Hitið ofninn í 175°C. Setjið heslihnetur í ofnskúffu og bakið í 5-10 mín eða þar til þær eru dökkar( það má líka rista þær á pönnu). Hrærið saman smjör og sykur þar til það er ljóst og létt. Setjið egg út í eitt í einu og hrærið allt vel saman. Bætið sjerrí eða safa út í og hrærið vel saman. Nuddið hýðið af heslihnetunum, gott að nota rakann eldhúspappír, og saxið þær mjög gróft. Það er allt í lagi að hafa nokkrar heilar. Blandið öllu öðru sem fer í kökuna út í og hrærið saman. Setjið bökunarpappír í 25 cm langt jólakökuform eða smyrjið það og jafnið deiginu í það. Bakið kökuna
a neðstu rim í ofni í klukkutíma. Hún er tilbúin þegar prjóni sem er stungið í hana kemur hreinn út og hætt að "hvissa" í henni.

NB: Trixið við að fá formkökur safaríkar er að taka þær úr ofninum á réttum tíma eða rétt eftir að hætt er að heyrast þetta kraumandi hvissandi hljóð í henni. Fylgist því með kökunni í lok bökunartímans.

Kaldir dagar

Það er gott að eiga uppskrift að nærandi súpu þessa köldu daga. Hér er uppskrift að súpu sem er ódýr, holl og meiriháttar góð. Ég geri gjarnan tvöfalda uppskrift og hita hana upp daginn eftir. Eins og góð kjötsúpa verður hún bara betri upphituð dagana eftir.

Linsubaunatómatsúpa

2 msk olía

1 laukur, saxaður

2 hvítlauksrif, söxuð

1 dós saxaðir tómatar

150 g grænar linsubaunir

3 dl tómatdjús eða 1 dós tómatar, maukaðir

8-10 dl vatn

2 tsk grænmetiskraftur

1 tsk sjávarsalt

1/2 tsk timian

nýmalaður pipar

Steikið lauk og hvítlauk í olíunni þar til hann er mjúkur og ilmandi. Bætið öllu sem fer í súpuna út í og látið súpuna sjóða í 30-40 mín. Smakkið hana til með salti og pipar. Berið súpuna fram með rifnum parmaosti.

Fyrstu skrefinn í bakstri

Þetta er uppskrift sem Jóhönna vinkona mín gaf mér fyrir mörgum árum síðan. Við bökuðum hana stundum saman þegar við vorum unglingsstelpur. Þetta er algjör nammikaka karamellan djúsí og lekur út um allt............

Jóhönnukaka

240 g smjör

150 g sykur

4 egg

150 g hveiti

2 tsk. lyftiduft

Hitið ofninn í 175°C. Hrærið smjör og sykur mjög vel saman eða þar til ljóst og kremkennt. Bætið eggjum út í einu í einu og hrærið vel saman. Bætið hveiti og lyftidufti út í og blandið vel. Jafnid deiginu í smurt form og bakð kökuna í 50-60 mín. Látið kökuna kólna aðeins, losið hana úr forminu og hvolfið á disk.

Karamellukrem:

2 dl rjómi

2 msk. síróp

120 g sykur

30 g smjör

1 tsk. vanilludropar

Sjóðið rjóma, síróp og sykur saman við vægan hita þar til það verður karamellukennt, það tekur um 8-10 mín. Bætið smjöri og vanillu út í. Hellið karamellunni yfir kökuna.

Sardínuveisla

Ég rakst á mynd af sardínuúrvali á netinu. Þessar með virgin-ólífuolíunni og sítrónu eru mitt uppáhald og ég fjárfesti alltaf í nokkrum dósum þegar ég fer til útlanda ( sem er nú því miður ekki oft þessa dagana). Það væri gaman að geta keypt svona góðar sardínur í dós hér á landi (tala kannski við þau í Laugu). Ristað súrdeigsbrauð, svona góðar sardínur og hvítvínsglas .......engin smá veisla.

Súkkulaðikaka án samviskubits ?

Við erum mjög veik fyrir súkkulaði og súkkulaðikökum á mínu heimili (vægt til orða tekið). Mig grunar að það eigi við um ansi marga. Þessi uppskrift kom til í ljúfri tilraun til að leyfa sér súkkulaðiköku en hafa hana aðeins hollari og næringaríkari. Ég hef bakað hana margoft og hún er sjaldnast eins því úrvalið af þurrkuðu ávöxtunum er mismunandi í skápunum mínum. Trönuber, apríkósur, ljósar rúsínur, döðlur, epli, perur, mangó eða gráfíkjur er til dæmis gott að nota. 2-3 tegundir er gott. Trönuber passa rosa vel með súkkulaði. Stundum set ég 1-2 msk. sultað engifer sem fæst í heilsubúðum, það er mjög gott. ....djúsí súkkulaðikaka sem er allra uppáhald.

Hollari súkkulaðikaka

4 stór egg eða 5 lítil

80 g hrásykur

40 g kókosmjöl

60 g fínt spelt

1/2 tsk. lyftiduft

200 g þurrkaðir ávextir og/eða hnetur

100 g 70% súkkulaði, saxað gróft

40 g smjör, mjúkt

Hitið ofninn í 170°C. Hrærið egg og sykur saman þar til það er ljóst og loftkennt. Blandið kókosmjöli, spelti og lyftidufti saman í skál. Saxið eða klippið ávextina niður og saxið hnetur gróft ( ef þið notið þær). Blandið þessu ásamt súkkulaðinu út í hveitiblönduna. Blandið hveitinu með ávöxtunum út í eggjahræruna og blandið saman með sleikju. Passið að hafa smjörið vel mjúkt, næstum bráðið og bætið því út í deigið. Það fellur aðeins en það er allt í lagi, það gerir hana klesstari. Setjið smjörpappír í botninn á 24 cm smelluformi og hellið deiginu í það. Bakið kökuna í 15-20 mín. Hún er tilbúin þegar hættir að "hvissa" í henni. Losið um barmana á kökunni og takið hana úr forminu, látið hana kólna aðeins á tertudisk.

Krem:

100 g súkkulaði 70 %

2 msk. smjör

1 msk. hlynsíróp

Bræðið allt saman í vatnsbaði eða í örbylgjuofni hellið yfir kökuna.

Franskt er það !

Þessi karamellubúðingur er í miklu uppáhaldi á mínu heimili. Við kynntumst þessum flauelsmjúka og sæta búðing þegar við bjuggum í Frakklandi. Þar í landi er hann jafnalgengur á eftirréttaseðli á veitingahúsum og súkkulaðikaka hér á landi ( sem sagt... alltaf). Í stórmörkuðum þar er síðan hægt að fá allskonar útgáfur.
En.......það jafnast ekkert á við heimalagaðann........að sjálfsögðu. Það má gera búðinginn í litlum formum til dæmis hvítu leirformunum sem eru oft notuð undir mjúka súkkulaðiköku eða í einu djúpu formi leir eða ál um 18-20 cm í ummál. Uppskriftin virkar löng en eftir að hafa gert búðinginn einu sinni er þetta með fljótlegri eftirréttum og hægt að hafa formin tilbúin í ísskáp eða hvolfa honum á diska eða fat og hafa hann tilbúinn þannig. Karamellubúðingurinn er bestur sama dag og hann er lagaður.

Franskur karamellubúðingur (Creme caramel)

fyrir 6-8

200 g sykur

6 dl mjólk

80 g sykur

1 vanillustöng

3 egg

3 eggjarauður

1 tsk. vanilludropar

Hitið ofninn í 180°C (170°C blástur). Setjið upp ketil af vatni til suðu ( til að hella í ofnskúffuna). Hellið sykrinum á pönnu og hitið hann þar til hann verður dökkbrún og fljótandi. Hellið sykrinum í ofnföst form annaðhvort 6-8 lítil eða eitt sem er djúpt og um það bil 20 cm að ummáli. Notið pottaleppa eða handska og veltið forminu þannig að sykurinn nái upp með formunum til hálfs.

Skerið vanillustöngina í tvennt eftir endilöngu og skafið kornin úr. Hitið mjólkina að suðu með kornum úr vanillustönginni og stönginni sjálfri, látið þetta standa með lokið á pottinum í 10 mín. Setjið egg, eggjarauður og sykur í skál og þeytið létt saman. Hellið mjólkinni út í í gegn um sigti og þeytið þar til samlagað. Bætið vanilludropum út í og hellið blöndunni í sykurklæddu formin.

Finnið ofnskúffu eða fat sem rúmar formin vel og raðið formunum í það. Setjið formin í ofninn og hellið vatni í ofnskúffuna svo nái upp á formin til hálfs. Bakið í 5 mínútur og lækki þá hitann í 160°C (150°C blástur). Bakið í um það bil 40 mínútur eða þar til búðingurinn er stífur viðkomu. Kælið vel og hvolfið síðan á diska. Það er gott að bera rjóma með og þá er gott að hella smá af karamellunni sem kemur af búðingnum út í hann.

Fyrsta haustlægðin

Það þarf bara eina góða haustlægð til að réttlæta það að draga fram góðar súpuuppskriftir. Þessi súpa er algjörlega mitt uppáhald. Hún er kjarngóð og bragðmikil og bara yndislega góð. Ég nota ýmist kindafille (án fitulags) eða vöðva eða lamba eða kindagúllas sem er oft á góðu verði í Fjarðakaup. Nú er bara að njóta komandi haustdaga, koma sér vel fyrir í sófanum með teppi og súpu sem getur næstum læknað hjartasár.

Lambakjötsúpa frá Íran

1 1/2 tsk. kumminfræ

1 1/2 tsk. kóríanderfræ

2-3 msk. olía

1 stór laukur

2 hvítlauksrif, söxuð

1 rautt chili, saxað smátt og fræ notuð eftir því sem þið þolið að hafa sterkt

300-400 g lamba eða kindakjöt, smátt skorið

1 tsk. allrahanda

3-4 msk. tómatpúrra

2 tsk. hunang eða púðursykur

10 -12 dl vatn

2 tsk. sjávarsalt og nýmalaður pipar

1 dós niðursoðnar kjúklingabaunir, bestar frá D´Rit sem eru í krukku og fást í heilsudeildum

50 g kús-kús

hnefafylli söxuð steinselja

Þurrsteikið kummin og kóríanderfræ á þurri pönnu í ca. 3 mín. Þetta er gert til þess að fá meira og betra bragð úr kryddinu. Steitið það í morteili. Hitið olíuna í potti og steikið laukinn við hægan hita þar til hann fer að verða glær. Steikið hvítlauk og chili með síðustu mínúturnar. Bætið lambakjöti á pönnuna og steikið þar til það er brúnað. Bætið allrahanda og kryddblöndunni út í og látið malla aðeins saman. Setjið tómatpúrru, vatn, hunang, salt og pipar út í og látið allt sjóða í 30 mín. Sigtið safann frá baununum og sjóðið þær með síðustu 10 mínúturnar. Slökkvið undir

pottinum, bætið kús-kús út í, setjið lok á og látið standa í 3-4 mín. Sáldrið steinselju yfir og smakkið til með sjávarsalti. Berið fram með góðu brauði.

Minning um Frakkland

Ég elska bökur...... allskonar.... ávaxta, súkkulaði, spínat........Mmmmmmm...... Sá nýjar apríkósur í búðinni í gær og stóðst þær ekki. Þær eru ekki mjög bragðmiklar einar sér en bakaðar í ofni með sykri eða í svona böku eru þær alveg meiriháttar góðar. Það má nota hvaða ávexti sem er í þessa uppskrift, ferskjur, nektarínur, perur, plómur, bláber, rifsber eða það sem ykkur finnst best.
Það er ekki vandi að gera góða bökuskel, bara að passa að mylja smjörið ekki of smátt, þá verður hún þurr og óspennandi. Það er auðvelt að gera deigið í matvinnsluvél, bara passa að hnoða ekki of lengi í restina, gott að taka deigið úr vélinni og klára að hnoða á borðinu og kæla í 30 mín áður en þið fletjið það út.


Ávaxtabaka

Sæt bökuskel:

180 g hveiti
2 msk. flórsykur
100 g smjör, ískalt
1 eggjarauða
1/2 dl ískalt vatn

Setjið hveiti og flórsykur í rúmgóða skál og blandið saman. Saxið kalt smjör í litla teninga og bætið út í. Myljið smjörið saman við hveitið þar til það er eins og litlar baunir. Hrærið eggjarauðu og vatn saman og bætið út í. Hnoðið saman þar til samlagað, ekki hnoða of lengi. Setjið deigið í plastfilmu og látið bíða í kæli í 30 mín. Hitið ofninn í 180°C. Fletjið deigið út á hveitistráðu borði og setjið í bökuform. Pikkið með gaffli á botninn á deigskelinni og bakið síðan í 12-15 mín eða þar til hún er farinn að taka lit.

Fylling:

500 g apríkósur
2 egg
1 dl sykur
2 dl rjómi
2 tsk. vanillusykur

smá meiri sykur

Skolið og skerið apríkósurnar í tvennt og fjarlægið steininn. Raðið þeim í forbakaða bökuskelina, flott að raða þétt og upp á rönd. Þeytið egg, sykur, rjóma og vanillusykur saman og hellið yfir apríkósurnar. Stráið smá sykri yfir þær og bakið bökuna í um það bil 30 mín eða þar til fyllingin er orðin stíf. Best nýbökuð en hægt að hita upp daginn eftir í 15 mín í 100°C heitum ofni.

Íslenskt kálfakjöt

Ég keypti íslenskt kalfakjöt síðustu helgi í Frú Laugu og hef verið að dásama það við alla sem hafa gaman af góðum mat. Reyndar var það þannig að Arnar, eigandi Laugu gaf svo miklar upplýsingar um kálfinn, hvað hann væri gamall þegar hann dó, hvar hann ólst upp og svo framvegis að við vorum bæði komin með tár í augun í búðinni þegar ég var að borga. Við hertum okkur upp heima og matreiddum þetta úrvalskjöt og bókstaflega sleiktum diskana á eftir, . Ég set hér inn hvernig við elduðum það því margir hafa spurt mig hvernig kálfakjöt er matreitt.

Kálfakjöt með fersku kryddi og sítrónu.
fyrir 4

1 kálfavöðvi (um 600 g)
2 msk. olía +1 msk. smjör
1 dl hveiti
salt og nýmalaður pipar
1 sítróna
nokkrir kvistir ferskar kryddjurtir, td. steinselja, timian eða estragon
50 g smjör

Skerið kálfavöðvann, þvert á vöðvann, í 2 sm sneiðar. Leggið sneiðarnar á bretti, setjið plastfilmu yfir og berjið létt á kjötið svo það fletjist aðeins út. Hitið olíu og smjör á pönnu, veltið sneiðunum upp úr hveiti og steikið 2 -3 mín á hvorri hlið, kryddið með salti og pipar. Passa að steikja ekki of lengi. Kreistið sítrónu og sáldrið kryddjurtum yfir og látið malla í 1 -2 mín. Bætið smjöri út í, minnkið hitann og látið bráðna svo úr verði svolítil sósa. Berið fram með góðu salati og nýjum íslenskum kartöflum. Gott að skera kartöflurnar í báta velta þeim upp úr olíu, maldonsalti og rósmarin og ofnsteikja við 200°C í 30-40 mín.

Eplakaka á rigningardegi

Það er alveg nauðsynlegt að kunna eina uppskrift að góðri eplaköku. Nýbökuð eplakaka getur gert kraftaverk. Hörðustu karlmenni geta breyst í mjúka bangsa, bara við kökuilminn. Þessi uppskrift er frekar hefðbundin og kemur frá vinkonu hennar mömmu minnar. Ég kaupi 1/2 líter af rjóma, nota smávegis í deigið og léttþeyti restina. Það þarf mikinn rjóma með svona góðri köku.

Hnetueplakaka

125 g smjör
1 1/2 dl sykur
2 egg
rifið hýði af einni sítrónu
2 1/2 dl hveiti
1 tsk. lyftiduft
2-3 msk. rjómi
2-3 epli, td. jónagold eða græn

2 msk. sykur
1 tsk. kanill
50 g valhnetur eða pecanhnetur

Stillið ofninn á 180°C. Hrærið smjör og sykur saman. Bætið eggjum út í einu í einu og síðan allt eftir röðinni. Flysjið eplin og skerið í þykka báta. Setjið deigið í 24-26 cm smurt form. Raðið eplum ofan á. Blandið saman sykri og kanel og sáldrið sykrinum og hnetum ofan á. Bakið í 35-40 mín. Berið fram með léttþeyttum rjóma bragðbættum með vanillusykri.

Tómataveisla

Það er svo gaman að koma í Frú Laugu á Laugalæk þessa dagana, búðin er sneisafull af allskonar tómötum. Rauðir, gulir, grænir og allt þar á milli. Það er frábært að baka litlu tómatana í ofni og nota út á salöt, í pasta eða setja þá í krukku og hella smá olíu yfir og geyma í ísskáp. Svona bakaðir eru þeir ótrúlega bragðmiklir.
Pasta með ofnþurrkuðum tómötum
fyrir 4

600 g litlir tómatar, konfekt, heilsu eða aðrir
olía
maldon-salt og nýmalaður pipar
nokkrir kvistir timian eða oreganó

200-300 g pasta, Chicco eða Jamie Oliver er í mínu uppáhaldi

2-3 msk. olía
2-3 hvítlauksrif, sneidd
4-6 sneiðar parmaskinka eða önnur góð hráskinka, skorin í bita

Hitið ofninn í 180°C. Skerið tómatana í tvennt og raðið þeim á bökunarpappír á ofnplötu. Penslið með olíu og malið salt og pipar ofan á. Bakið í um 20-30 mín eða þar til þeir eru vel bakaðir. Sjóðið pasta eftir leiðbeiningum á pakkanum.Steikið hvítlauk og parmaskinku í 2-3 msk. olíu. Takið 1 dl pastavatn frá og sigtið síðan pastað. Blandið pasta, tómötum, steiktum hvítlauk og skinku saman í stórri skál og blandið nokkrum skvettum af pastavatninu saman við. Blandið vel saman, setjið á diska og rífið parmaost yfir.

Súkkulaðikaka sem tekur sig alvarlega.

Dökk mjúk súkkulaðikaka, lekandi súkkulaði......ummmm.....hvað er betra á rigningardegi þegar rignir meira að segja ösku. Þetta er stór og drjúg kaka, er með formkökudellu þessa dagana.



Alvöru súkkulaðiformkaka

250 g smjör, mjúkt
250 g sykur
3 egg, stór
2 eggjarauður
320 g hveiti
30 g kakó
1 1/2 tsk. lyftiduft
1 1/2 dl mjólk
2 tsk. vanilludropar
100 g súkkulaði, saxað gróft
100 g súkkulaði, brætt til að smyrja ofan á

Hitið ofninn í 175°C. Hrærið saman smjör og sykur í 5 mín. Bætið eggjum út í einu í einu. Bætið rauðunum í og hrærið smástund áfram. Sigtið hveiti, kakó og lyftiduft saman og bætið í deigið ásamt mjólk og vanillu. blandið vel saman. Smyrjið botn og hliðar á 30 cm jólakökuform með olíu eða smjöri. Jafnið deiginu í formið. Bakið kökuna, á neðstu rim í ofninum,í um klukkutíma. Kælið aðeins og takið síðan varlega úr forminu. Smyrjið kökuna með súkkulaði þegar hún hefur kólnað aðeins.

Salat á sumardegi

Það er algengt að sjá þetta salat á matseðlum léttari veitinga og kaffihúsa enda uppáhald margra. Heimalagaðir brauðteningar eru málið í þessu salati og Romanie-salatið stökka sem hefur fengist undanfarið í Bónus og víðar. Það er fátt betra en gott kjúklingasalat og ískalt hvítvín eða sódavatn á fallegum sumardegi eins og núna.

Cesar-salat
fyrir 4

1/2 snittubrauð, ciabatta-brauð eða 6 sneiðar fínt ítalskt brauð
3 msk. ólífuolía
maldon salt
steinselja

smá olía

2-3 kjúklingabringur
1-2 stk. Romanie-salat, fer eftir stærð
parmaostur í flögum

steinselja, söxuð

salatsósa:

1 hvítlauksrif, marið
1/2 tsk. maldonsalt
5 msk. mæjones
1 msk. hvítvínsedik
1 dl parmaostur, rifinn

Hitið ofninn í 200°C. Setjið örk af bökunarpappír í ofnskúffu. Skerið brauðið í teninga og setjið á pappírinn ásamt 3 msk. olíu, maldonsalti og steinselju, blandið þessu saman. Bakið brauðið þar til það er gullið og girnilegt. Kljúfið kjúklingabringurnar í tvo hluta og steikið kjúklingabringurnar í smá olíu, látið kólna aðeins á bretti. Hrærið allt saman sem á að fara í salatsósuna, þynnið hana með smá vatni. Skolið salatið og setjið í skál. Brytjið kjúklinginn niður og setjið út á salatið ásamt brauðteningum. Hellið salatsósuni út á og blandið létt saman. Sáldrið parmaostaflögum og saxaðri steinselju út á salatið. Nammi-namm !!!!!

Afturhvarf til fortíðar

Vinkona mín fór að segja mér frá bestu brúnköku sem hún hafði nýlega smakkað. Kakan fékk hana til að hugsa um æskuna, sveitina og einhverjar frænkur sem hún hafði greinilega einhverja matar- og kökuást á. Ég á sjálf góðar minningar um svona köku en hef ekki bakað hana í mörg ár. Mér datt í hug að sjá hvort ég fyndi uppskrift í bók eftir Helgu Sigurðardóttir. Bókin heitir Bökun í heimahúsum og er gefin út 1930. Að sjálfsögðu var hún þar, og frábær uppskrift. Ég minnkaði sykurinn aðeins og breytti uppskriftinni örlítið að mínum smekk en finnst meiriháttar gott að setja sítrónubörk í hana. Nýbökuð með ískaldri léttmjólk sló hún algjörlega í gegn.

Brúnkaka

250 g smjör

320 g púðursykur

2 egg

500 g hveiti

1 full tsk. kanell

1 full tsk. negull

1 tsk. matarsódi

100 g kúrenur

rifið hýði af 1 sítrónu

2 1/2 dl mjólk

Hitið ofninn í 170°C. Hrærið saman smjör og sykur þar til létt og loftkennt, það skiptir miklu máli í formkökubakstri að hræra smjör og sykur mjög vel saman. Bætið eggjum út í einu í einu, hrærið vel saman. Sigtið hveiti, kanel, negul og matarsóda saman og bætið út í ásamt öllu öðru sem er í uppskriftinni. Hrærið saman þar til allt er vel samlagað. Smyrjið 30 cm langt jólakökuform með smjöri eða olíu og jafnið deiginu í formið. Bakið kökuna í um það bil klukkutíma. Kakan er tilbúin þegar prjóni sem stungið er í hana kemur hreinn út.

Góðar ólífur

Þessar ólífur eru nýjasta sælkerauppgvötunin. Það er kominn ólífubar í Hagkaup í Kringluna og hægt að velja um nokkrar sortir. Eftir nokkrar ferðir og nákvæma smökkun komu tvær tegundir lang-lang best út. Þessar á myndinni sem eru með jalapeno-pipar innan í og önnur tegund af grænum sem eru með sítrónuberki innan í, nammi-namm......

Þetta er ekki það ódýrasta í bænum en það hefur ekki verið auðvelt að fá góðar ólífur undanfarið og góðar ólífur eru bara svo góðar.

Afmæliskakan ! Þetta er súkkulaðikakan sem var og er bökuð fyrir öll afmæli í fjölskyldunni. Ég hef notað sömu uppskriftina, sem var í smjörlíkisbækling sem mamma mín átti, síðan ég byrjaði að baka alvöru súkkulaðiköku með kremi. Það rifjast oft upp þegar ég set kremið á kökuna hvað mér þótti erfitt að gera það fyrst og ánægjan þegar það heppnaðist vel. Núna er sonur minn búin að halda upp á afmæli eins árs sonar síns og notaði að að sjálfsögðu sömu uppskrift, gaman þegar uppskriftir ganga til næstu kynslóðar.
Kremið á kökuna er ljóst súkkulaðikrem og það finnst öllum algjört "must" að hafa það.

Afmæliskaka

Ef þið viljið hafa kremið ljóst eins og hér verður að nota smjörlíki. Kremið er líka gott með smjöri er verður dekkra og þykkara. Í upprunalegu uppskriftinni eru notuð amerísk bollamál.

Botnar:

2 bollar hveiti

1 1/2 bolli sykur

4 msk. dökkt kakó

130 g smjör, mjúkt

1 tsk. matarsódi

1 tsk. lyftiduft

1 bolli mjólk

2 stór egg eða 3 minni

Hitið ofninn í 175°C, 165 á blástur. Setjið allt nema egg í hrærivélarskál og hrærið í 2 mín. Bætið eggjum út í, einu í einu og hrærið aðrar 2 mín. Setjið deigið í 2 smurð 26 cm breið kringlótt kökuform og bakið botnana í 25 mín ( um 20 á blæstri) kakan er tilbúin þegar hún losnar frá börmunum og prjóni sem stungið er í hana kemur hreinn út. Kælið kökubotnana.

Krem:

300 g flórsykur

200 g smjörlíki

2 msk. vatn

3-4 msk. dökkt kakó

1 eggjarauða

1 tsk. vanilludropar

Sigtið flórsykur í hrærivélarskál. Takið 100 g af smjörlíkinu og setjið í pott með vatni og kakó þar til vel samlagað. Hellið út í flórsykurinn og hrærið vel saman. Bætið restinni af smjörlíkinu út í litlum bitum og hrærið þar til kalt. Kremið er fyrst dökkt en verður ljósara þegar það kólnar. Bætið eggjarauðu og vanillu út í. Smyrjið kreminu á kökuna og skreytið hana með nammi eða kókosmjöli.

Ferskt Kóríander

Ferskt kóríander er í miklu uppáhaldi. Það er eitt það besta ferska krydd sem ég get hugsað mér. Hnefafylli út á gott salat breytir salatinu í sælkerasalat. Þetta kóríander-pestó er gott út á bæði kjöt og fisk og er himneskt !!!! Það er best að kaupa ferskt kóríander í asíubúðunum, í Mai-Tai við Hlemm fá þær sendingu einu sinni í viku.

Kóríanderpestó

1 stórt búnt kóríander

1 aðeins minna búnt steinselja eða sleppa og nota bara risabúnt kóríander

50 g afhýddar möndlur

1 -2 hvítlauksrif

1/2 tsk maldonsalt

1 dl góð olía

Setjið allt nema olíu í matvinnsluvél og blandað vel saman. Hellið olíunni út í í mjórri bunu, látið vélina vinna á meðan og blandið sósunni vel saman. Þið getið líka hellt olíunni í 3 skvettum út í ef vélin er lokuð eins og litli blandarinn minn og skafið skálina að innan annars lagið svo allt blandist vel saman. Kælið í 1-4 klst. Geymist í um viku í ísskáp.

Noodle Station

Var á vappi um miðbæinn um helgina og sá að Noodle station,- staðurinn með góðu núðlurnar var búin að opna aftur. Er líklega búin að fá leyfið fyrir staðnum. Mér finnst þetta svo frábær núðlustaður, engin umgjörð bara góðar núðlur á sanngjörnu verði, ekki laust við að manni finnist maður vera kominn til útlanda.

Mæli með honum þessum, er á horninu á Skólavörðustíg og Klappastíg.

Súkkulaðikaka á sunnudegi

Þetta er alvöru súkkulaðikaka, ótrúlega bragðmikil og djúsí. Ég sá uppskriftina fyrst í bók eftir franska bakarann fræga Pierre Hermé en hef aðeins breytt henni að mínum smekk. Ef ykkur langar í alvöru súkkulaðiköku fyrir fullorðna sem passar líka með rauðvíni eftir matinn er þetta kakan. Bókin fæst á amazon.com

Súkkulaðiformkaka

100 g þurrkaðar apríkósur

150 g sykur

120 g marsípan

4 stór egg

180 g hveiti, pilsbury´s

40 g kakó

1/2 tsk. lyftiduft

150 g gott súkkulaði, saxað gróft

50 g sykrað engifer, saxað, fæst í heilsubúðum

1 1/2 dl mjólk

180 g smjör, brætt og kælt aðeins

Setjið apríkósur í skál og hellið sjóðandi vatni yfir þær, látið þær bíða í 5 mín. Sigtið þær, þerrið og klippið eða skerið í minni bita.

Hitið ofninn í 180°C, 165°C á blástur. Hrærið saman sykur, marsípan og egg þar til ljóst og loftkennt. Sigtið hveiti, kakó og lyftiduft saman. Blandið apríkósum, súkkulaði og engifer út í hveitiblönduna. Blandið þurrefnum ásamt mjólk og smjöri út í deigið og blandið saman með sleikju. Setjið smjörpappír í botn og með hliðum á stóru jólakökuformi (sjá mynd) og smyrjið endana á forminu með olíu. Hellið deiginu í formið og bakið kökuna neðst í ofni í um klukkutíma eða þar til deig festist ekki við prjón sem er stungið í kökuna miðja. Það er líka gott ráð að "hlusta" á kökuna í lok bökunartímans. Um leið og "hviss" hljóð er hætt að heyrast er kakan bökuð.

Þessi bók er nýkomin út og er á óskalistanum. Hún er nýjasta bókin hans David Lebovitz
sælkerans sem sneri baki við lífinu sem desertkokkur á fínu veitingahúsi og settist að í París. Hann er með skemmtilegt blogg, uppskriftirnar hans eru skotheldar. Langar í þessa köku.......Mmmmm.........

Pakkasósur "nei takk"

Ég vil ekki vera með leiðindi en....mér finnast pakkasósur ekki spennandi, lítið annað en lím og aukaefni og nota þær helst ekki. Með flösku af óáfengu hvítvíni (sem kostar eins og 3 sósupakkar og endist lengi), gróft sinnep, hunang og sýrðan rjóma að vopni er hægt að gera frábæra sósu á grísa eða kálfakjötsneið og kjúkling. Safinn af kjötinu blandast í sósuna og gerir hana ótrúlega góða.

Kjúklingabringur með sósu

fyrir 2-3

2 kjúklingabringur, má líka nota grísa eða kálfakjötsneiðar

2 msk. olía

1 tsk. smjör

1/2 -3/4 dl hvítvín, má vera óáfengt

1 kúfuð tsk. gróft sinnep

1 tsk. hunang

100 g sýrður rjómi

1/2 tsk. estragon eða 1 -2 tsk. estragon, (má sleppa)

Skerið hverja kjúklingabringu í tvær steikur með því að leggja lófan ofan á hana og skera þvert í gegnum hana með góðum hníf. Hitið olíu og smjör á pönnu og steikið bringusteikurnar á báðum hliðum þar til þær eru gegnumsteiktar, saltið og piprið. Lækkið aðeins hitann og hellið hvítvíni á pönnuna, bætið sinnepi og hunangi út í og látið malla vel saman. Bætið sýrðum rjóma og estragon út í og hrærið vel saman og látið sjóða 1 mín. Gott að borða ofnsteikt grænmeti með.

Helgarbakstur
Kardimommufræ eru frábært krydd og breytir venjulegu sætabrauðsdeigi í eitthvað alveg nýtt. Það er best að kaupa heil hylki, þau fást í flestum verslunum og örugglega í heilsubúðum og ódýrust í Asíubúðunum. Til að ná fræjunum innan úr er best að setja þau á bretti og merja þau með t.d.hnífsblaði, setja fræin í mortel eða plastpoka og merja vel. Ilmurinn er ómótstæðilegur Ummm..........

Kanelsnúðar

250 g hveiti
120 g smjör, kalt í teningum
1 dl mjólk, fingurvolg
2 tsk. þurrger
3 msk. sykur
1/2 tsk. salt
1/2 -1 tsk. kardimommufræ, steytt

fylling:

100 g marsípan
60 g smjör
3 msk. sykur
2 tsk. kanill

Myljið hveiti og smjör saman. Bætið öllu öðru út í og hnoðið samfellt deig. Setjið deigið í olíuborna skál og látið hefast á hlýjum stað í um 30 mín. Hitið ofninn í 200°C. Fletjið deigið út í ferning um 40x20 cm. Rífið marsípanið og smjörið jafnt yfir deigið. Blandið sykri og kanel saman og stráið yfir líka. Rúllið lengjunni upp eftir lengri hliðinni og skerið hana í 12-14 bita. Raðið þeim á bökunaplötu klædda smjörpappír og látið hefast aftur undir klút í 30 mín. Penslið með mjólk eða eggi og dustið meiri kanel yfir ef þið viljið. Bakið snúðana í um 20 mín eða þar til þeir eru fallega gullnir og girnilegir.

Kjúklingur á páskum
Það er endalaust hægt að gera góða rétti úr kjúklingabringum. Þessi réttur varð til þegar fullt var til af estragon í ísskápnum og var búin að gera alla uppáhaldsréttina úr þessu frábæra og sérstaka kryddi. Ofan á í staðin fyrir paprikurnar má setja hálfsólþurrkaða tómata frá Sacla, þegar þeir fást eða gott kryddmauk eins og klettakáls, basil eða kóríanderpestó. Eða bara kíkja í búrið eða ísskápinn og láta ímyndunaraflið leiða sig áfram...........


Estragonkjúklingur
fyrir 4

3-4 kjúklingabringur
2 msk. olía
1-2 msk. estragon eða 1-2 tsk. þurrkað
50-80 g smjör
salt og nýmalaður pipar

1/2 krukka paprikur í olíu, sigtað
50 g parmaostur
1-2 msk. ferskt estragon eða 1-2 tsk. þurrkað


Hitið ofninn í 200°C. Leggið lófann ofan á kjúklingabringurnar og skerið þær í tvo hluta. Leggið hverja kjötsneið á plast, leggið annað plast yfir og fletjið bringuna aðeins út með kefli eða flösku svo hún verði stærri um sig og flatari. Steikið kjötið á báðum hliðum í olíunni og leggið í ofnfast fat. Leysið djúsið upp á pönnunni með því að bræða smjör og setja estragon út í, hellið þessu í fatið, hreinsið það sem eftir er á pönunni með 1/2 dl vatni og hellið líka í fatið. Saltið og piprið kjötið. Setjið ferskt estragon, papriku eða tómat ofan á. Rífið ostinn og stráið yfir. Bakið í ofni þar til ðsturinn er bráðinn. Berið fram með ofnsteiktu grænmeti eða fersku salati

Súkkulaði-Súkkulaði

Svo það sé alveg á hreinu á þessi heimalagaða súkkulaðisósa nær ekkert sameiginlegt með þeirri sem fæst keypt í sprautuflöskum út í búð. Hún verður samt jafn góð og gæðin á súkkulaðinu sem þið setjið í hana, svo notið eins gott súkkulaði og þið hafið efni á. Sumt er alveg þess virði að borga vel fyrir, við erum að tala um SÚKKULAÐI !!!!!!!!!!!!

Heit súkkulaðisósa

150 g súkkulaði, suðusúkkulaði eða 70%
2 dl matreiðslurjómi, rjómabland eða mjólk
2-4 msk. síróp, venjulegt eða hlynsíróp
30 g smjör

Setjið allt í pott og hitið vel saman. Magnið af sírópi fer eftir því hversu hreint súkkulaði þið notið. Það þarf meira síróp í dökka súkkulaðið. Smakkið samt til, súkkulaði er misjafnt. Sósan geymist í viku í kæliskáp.

Súkkulaði

Þessar súkkulaðikökur eru með þeim bestu sem ég fæ. Þær eru ekki ódýrar en úr uppskriftinni fást 18 stórar kökur og ein á mann er meir en nóg því þær eru fullar af súkkulaði og mjög bragðmiklar. Það er gott að frysta þær og eiga í eftirrétt með ís eða með afgangnum af rauðvíninu eftir vel heppnaða máltíð.

Stórar Súkkulaðikökur

80 g 70% súkkulaði
150 g suðusúkkulaði, venjulegt
80 g smjör
1-2 tsk. neskaffi, má sleppa
2 egg, stór
140 g sykur
1 tsk. vanilludropar
50 g hveiti
1 tsk. lyftiduft
100 g súkkulaði, saxað eða dropar
150 g valhnetur, saxaðar gróft

Hitið ofninn í 180°C eða 160°C blástur. Bræðið báðar tegundir af súkkulaði og smjör saman í örbylgjuofni eða í vatnsbaði við vægan hita, leysið kaffiduftið upp í blöndunni. Þeytið egg og sykur saman þar til ljóst og létt. Blandið hveiti og lyftidufti saman. Blandið öllu saman og blandið saman með sleikju í samfellt deig. Setjið 2 arkir af bökunarpappír á 2 ofnplötur. Setjið deigið með tveim matskeiðum á pappírinn, þið eigið að fá 18 kökur, 9 á hverja plötu. Bakið kökurnar í 10-12 mín, 8-10 mín í blástursofni. Kökurnar má alls ekki ofbaka, þær eiga að vera þurrar að utan en mjúkar innan í. Kökurnar eru unaðslegar nýbakaðar en síðan gott að setja þær í box, setja smá bökunarpappír á milli þeirra og frysta.

Fiskur í matarboðið

Gremolata er kryddmauk sem er gott í allt mögulegt og sérlega gott til að smyrja ofan á fisk. Stórlúða með gremolata er frábær veislumatur en annar hvítur fiskur er líka góður. Hér er spriklandi ferskt lúðuflak notað og með kartöflum soðnum með spergilkáli alveg meiriháttar gott.

Fiskur með Gremolata
fyrir 4

800 g ferskur fiskur
1 sítróna
hnefafylli af ferskri steinselju
100 g grænar ólífur
4-5 msk. olía
1 tsk. maldonsalt
3 hvítlauksrif
smjörklípa

Hitið ofninn í 180°C. Smyrjið ofnfast form með olíu og leggið fiskflakið í það. Setjið börk af sítrónu, steinselju, ólífur, salt og hvítlauk í matvinnsluvél og blandið vel saman. Bætið safa af 1/2 sítrónu og slatta af olíu út í. Smyrjið þessu á fiskinn. Setjið smávegis af smjöri í litlum klípum ofan á flakið. Bakið í um 15 mín. Lengur ef þið eruð með stórlúðu, svona um 20-25 mín eftir þykkt stykkjana. Berið fram með kartöflum soðnum í saltvatni og sjóðið spergilkálsbrúska með síðustu 3-4 mínúturnar. Setjið kartöflublönduna í skál og smá smjör og nýmalaðan pipar saman við.