Pakkasósur "nei takk"

Ég vil ekki vera með leiðindi en....mér finnast pakkasósur ekki spennandi, lítið annað en lím og aukaefni og nota þær helst ekki. Með flösku af óáfengu hvítvíni (sem kostar eins og 3 sósupakkar og endist lengi), gróft sinnep, hunang og sýrðan rjóma að vopni er hægt að gera frábæra sósu á grísa eða kálfakjötsneið og kjúkling. Safinn af kjötinu blandast í sósuna og gerir hana ótrúlega góða.

Kjúklingabringur með sósu

fyrir 2-3

2 kjúklingabringur, má líka nota grísa eða kálfakjötsneiðar

2 msk. olía

1 tsk. smjör

1/2 -3/4 dl hvítvín, má vera óáfengt

1 kúfuð tsk. gróft sinnep

1 tsk. hunang

100 g sýrður rjómi

1/2 tsk. estragon eða 1 -2 tsk. estragon, (má sleppa)

Skerið hverja kjúklingabringu í tvær steikur með því að leggja lófan ofan á hana og skera þvert í gegnum hana með góðum hníf. Hitið olíu og smjör á pönnu og steikið bringusteikurnar á báðum hliðum þar til þær eru gegnumsteiktar, saltið og piprið. Lækkið aðeins hitann og hellið hvítvíni á pönnuna, bætið sinnepi og hunangi út í og látið malla vel saman. Bætið sýrðum rjóma og estragon út í og hrærið vel saman og látið sjóða 1 mín. Gott að borða ofnsteikt grænmeti með.

Helgarbakstur
Kardimommufræ eru frábært krydd og breytir venjulegu sætabrauðsdeigi í eitthvað alveg nýtt. Það er best að kaupa heil hylki, þau fást í flestum verslunum og örugglega í heilsubúðum og ódýrust í Asíubúðunum. Til að ná fræjunum innan úr er best að setja þau á bretti og merja þau með t.d.hnífsblaði, setja fræin í mortel eða plastpoka og merja vel. Ilmurinn er ómótstæðilegur Ummm..........

Kanelsnúðar

250 g hveiti
120 g smjör, kalt í teningum
1 dl mjólk, fingurvolg
2 tsk. þurrger
3 msk. sykur
1/2 tsk. salt
1/2 -1 tsk. kardimommufræ, steytt

fylling:

100 g marsípan
60 g smjör
3 msk. sykur
2 tsk. kanill

Myljið hveiti og smjör saman. Bætið öllu öðru út í og hnoðið samfellt deig. Setjið deigið í olíuborna skál og látið hefast á hlýjum stað í um 30 mín. Hitið ofninn í 200°C. Fletjið deigið út í ferning um 40x20 cm. Rífið marsípanið og smjörið jafnt yfir deigið. Blandið sykri og kanel saman og stráið yfir líka. Rúllið lengjunni upp eftir lengri hliðinni og skerið hana í 12-14 bita. Raðið þeim á bökunaplötu klædda smjörpappír og látið hefast aftur undir klút í 30 mín. Penslið með mjólk eða eggi og dustið meiri kanel yfir ef þið viljið. Bakið snúðana í um 20 mín eða þar til þeir eru fallega gullnir og girnilegir.

Kjúklingur á páskum
Það er endalaust hægt að gera góða rétti úr kjúklingabringum. Þessi réttur varð til þegar fullt var til af estragon í ísskápnum og var búin að gera alla uppáhaldsréttina úr þessu frábæra og sérstaka kryddi. Ofan á í staðin fyrir paprikurnar má setja hálfsólþurrkaða tómata frá Sacla, þegar þeir fást eða gott kryddmauk eins og klettakáls, basil eða kóríanderpestó. Eða bara kíkja í búrið eða ísskápinn og láta ímyndunaraflið leiða sig áfram...........


Estragonkjúklingur
fyrir 4

3-4 kjúklingabringur
2 msk. olía
1-2 msk. estragon eða 1-2 tsk. þurrkað
50-80 g smjör
salt og nýmalaður pipar

1/2 krukka paprikur í olíu, sigtað
50 g parmaostur
1-2 msk. ferskt estragon eða 1-2 tsk. þurrkað


Hitið ofninn í 200°C. Leggið lófann ofan á kjúklingabringurnar og skerið þær í tvo hluta. Leggið hverja kjötsneið á plast, leggið annað plast yfir og fletjið bringuna aðeins út með kefli eða flösku svo hún verði stærri um sig og flatari. Steikið kjötið á báðum hliðum í olíunni og leggið í ofnfast fat. Leysið djúsið upp á pönnunni með því að bræða smjör og setja estragon út í, hellið þessu í fatið, hreinsið það sem eftir er á pönunni með 1/2 dl vatni og hellið líka í fatið. Saltið og piprið kjötið. Setjið ferskt estragon, papriku eða tómat ofan á. Rífið ostinn og stráið yfir. Bakið í ofni þar til ðsturinn er bráðinn. Berið fram með ofnsteiktu grænmeti eða fersku salati

Súkkulaði-Súkkulaði

Svo það sé alveg á hreinu á þessi heimalagaða súkkulaðisósa nær ekkert sameiginlegt með þeirri sem fæst keypt í sprautuflöskum út í búð. Hún verður samt jafn góð og gæðin á súkkulaðinu sem þið setjið í hana, svo notið eins gott súkkulaði og þið hafið efni á. Sumt er alveg þess virði að borga vel fyrir, við erum að tala um SÚKKULAÐI !!!!!!!!!!!!

Heit súkkulaðisósa

150 g súkkulaði, suðusúkkulaði eða 70%
2 dl matreiðslurjómi, rjómabland eða mjólk
2-4 msk. síróp, venjulegt eða hlynsíróp
30 g smjör

Setjið allt í pott og hitið vel saman. Magnið af sírópi fer eftir því hversu hreint súkkulaði þið notið. Það þarf meira síróp í dökka súkkulaðið. Smakkið samt til, súkkulaði er misjafnt. Sósan geymist í viku í kæliskáp.

Súkkulaði

Þessar súkkulaðikökur eru með þeim bestu sem ég fæ. Þær eru ekki ódýrar en úr uppskriftinni fást 18 stórar kökur og ein á mann er meir en nóg því þær eru fullar af súkkulaði og mjög bragðmiklar. Það er gott að frysta þær og eiga í eftirrétt með ís eða með afgangnum af rauðvíninu eftir vel heppnaða máltíð.

Stórar Súkkulaðikökur

80 g 70% súkkulaði
150 g suðusúkkulaði, venjulegt
80 g smjör
1-2 tsk. neskaffi, má sleppa
2 egg, stór
140 g sykur
1 tsk. vanilludropar
50 g hveiti
1 tsk. lyftiduft
100 g súkkulaði, saxað eða dropar
150 g valhnetur, saxaðar gróft

Hitið ofninn í 180°C eða 160°C blástur. Bræðið báðar tegundir af súkkulaði og smjör saman í örbylgjuofni eða í vatnsbaði við vægan hita, leysið kaffiduftið upp í blöndunni. Þeytið egg og sykur saman þar til ljóst og létt. Blandið hveiti og lyftidufti saman. Blandið öllu saman og blandið saman með sleikju í samfellt deig. Setjið 2 arkir af bökunarpappír á 2 ofnplötur. Setjið deigið með tveim matskeiðum á pappírinn, þið eigið að fá 18 kökur, 9 á hverja plötu. Bakið kökurnar í 10-12 mín, 8-10 mín í blástursofni. Kökurnar má alls ekki ofbaka, þær eiga að vera þurrar að utan en mjúkar innan í. Kökurnar eru unaðslegar nýbakaðar en síðan gott að setja þær í box, setja smá bökunarpappír á milli þeirra og frysta.

Fiskur í matarboðið

Gremolata er kryddmauk sem er gott í allt mögulegt og sérlega gott til að smyrja ofan á fisk. Stórlúða með gremolata er frábær veislumatur en annar hvítur fiskur er líka góður. Hér er spriklandi ferskt lúðuflak notað og með kartöflum soðnum með spergilkáli alveg meiriháttar gott.

Fiskur með Gremolata
fyrir 4

800 g ferskur fiskur
1 sítróna
hnefafylli af ferskri steinselju
100 g grænar ólífur
4-5 msk. olía
1 tsk. maldonsalt
3 hvítlauksrif
smjörklípa

Hitið ofninn í 180°C. Smyrjið ofnfast form með olíu og leggið fiskflakið í það. Setjið börk af sítrónu, steinselju, ólífur, salt og hvítlauk í matvinnsluvél og blandið vel saman. Bætið safa af 1/2 sítrónu og slatta af olíu út í. Smyrjið þessu á fiskinn. Setjið smávegis af smjöri í litlum klípum ofan á flakið. Bakið í um 15 mín. Lengur ef þið eruð með stórlúðu, svona um 20-25 mín eftir þykkt stykkjana. Berið fram með kartöflum soðnum í saltvatni og sjóðið spergilkálsbrúska með síðustu 3-4 mínúturnar. Setjið kartöflublönduna í skál og smá smjör og nýmalaðan pipar saman við.

Ítalskar Biskottí

Þær eru rosa góðar þessar Biskottí-kökur. Uppskriftin er með próteinríku hveiti sem er mjög gott að nota. Það er auðveldara að eiga við deigið og áferðin verður svo flott. Þessar kökur eru ekki mjög sætar, mér finnast þær betri þannig en súkkulaðið bætir það síðan upp.

Biscotti kökur

24-26 stk.

300 g hveiti, ítalskt 00 eða brauðhveiti frá Kornax

120 g sykur

50 g 3 tegundir af hnetum, samtals 150 g

2 stór egg

1 eggjarauða

2 tsk. vanilludropar

150 g súkkulaði til að hjúpa með.

Hitið ofninn í 180°C eða 160°C á blæstri. Setjið öll þurrefni í skál og sláið eggin saman með vanillunni í annari. Blandið þessu saman og hnoðið í samfellt deig. Setjð bökunarpappír á ofnplötu og mótið hleif um 10x35 cm stóran. Það er gott að nota blauta fingur. Bakið hleifinn í 25-30 mín, hann á að vera bakaður í gegn. Setjið hann á skurðarbretti og skerið hann í þunnar sneiðar, rúmlega 1 cm þunnar. Raðið þeim á bökunarplötuna og bakið aftur í um 10-15 mín eða þar til þær eru farnar að taka lit. Bræðið súkkulaði og dýfið neðri helmingnum á kökunum í það. Látið kólna, gott að láta þær standa við glugga.