Grillaður lax með góðri sósu

Lax er uppáhald allra á mínu heimili sérstaklega svona grillaður. Ég pensla hann ekki með neinu, krydda með salti og pipar og kannski smá chiliflögum og læt hann bara grillast í eigin safa, okkur finnst hann bestur þannig. Hinsvegar erum við veik fyrir þessari sósu "Doria" (gúrkusmjöri). Sósan er að frönskum hætti og var kennd í kokkaskólanum. Hún er "klassiker"og eitt af því sem ég lærði þar og nota enn þann dag í dag.

Grillaður lax "Doria"

fyrir 4

Það er mjög sniðugt að grilla laxinn svona í ofninum. Fitan af laxinum, sem er oft bragðsterk af eldislaxinum, rennur í raufarnar á pappírnum og eftir verður stökkur og bragðgóður laxinn. Það sem betra er að það þarf ekki að þrífa neina pönnu, bara pakka pappírnum saman þegar búið er að grilla.

4 falleg laxastykki

sjávarsalt og nýmalaður svartur pipar,

Setjið rist ofan á ofnskúffu, ristin þarf að vera jafnstór eða þannig að hún hanfi ofan á skúffunni. Leggið tvöfalt lag, á misvíxl svo það verði tvöfalt í miðjunni, af álpappír á ristina. Hafið pappírinn a.m.k. helmingi lengri en ristin er. Setjið pappírinn varlega niður í raufarnar þannig að það myndist rásir, þær þurfa ekki að vera djúpar. Þetta er gert til þess að fitan af laxinum renni af honum. Stillið ofninn á grill. leggið laxinn ofan á pappírinn og kryddið hann. Grillið laxinn í 10 mín, fer þó eftir stærð stykkjana. Fylgist með honum og kíkið inn í hann með hníf. Hann er tilbúinn þegar miðjan er aðeins rauð því hann heldur áfram að eldast í 1-2 mín eftir að hann er kominn út úr ofninum. Hann er bestur og safaríkastur ef næst að ofelda hann ekki.

Sósa Doria

1/2 agúrka

150 g smjör

sjávarsalt

ferskt dill

Afhýðið agúrkuna og takið kjarnann úr. Skerið hana í þunnar sneiðar. Sjóðið agúrkuna í smjörinu í 5-8 mín. Saxið dill og bætið í ásamt smá salti og pipar, látið krauma aðeins. Berið fram með salati og/eða soðnum kartöflum.

Ómótstæðileg Naan-brauð

Heimabökuð brauð eru það besta í heimi. Hér er uppskrift að góðu matbrauði sem passar með súpum og allskonar kássum. Það þarf ekki endilega að nota allt sem talið er upp ofan á brauðin. Bara salt og smjör er mjög gott.

Naan brauð

6 -8 stk.

1 1/4 dl fingurvolg mjólk

2 tsk. þurrger

300 g hveiti

1 msk. sykur eða hunang

1/2 tsk. salt

1 tsk. lyftiduft

2 msk. olía

1 dl jógúrt

ofan á:

maldon- salt

3 msk. brætt smjör, má nota olíu í staðinn

nigellufræ, rifinn hvítlaukur og eða ferskt kóríander

Leysið þurrgerið upp í volgri mjólkinni. Blandið hveiti, sykri, salti, lyftidufti, olíu, jógúrt og mjólkur/gerblöndunni í skál og hnoðið vel saman. Látið deigið lyfta sér á hlýjum stað í 30 mín. Hitið ofninn í 230°C, 210°C á blástur. skiptið deiginu í 6 -8 hluta og fletjið hvern hluta út í flata köku ca. 1 -2 cm á þykkt. Raðið deigkökunum á 2 ofnplötur, gott að nota bökunarpappír. Látið deigkökurnar lyfta sér aftir í 20-30 mín. Bakið kökurnar í 8-10 mín. Penslið brauðin með smjöri eða olíu, stráið maldonsalti, nigellufræum og rifnum hvítlauk ofan á og klippið kóríander ofan á ef þið notið það.

Heimalagað pasta

Pastavél og semolína hveiti er eiginlega nauðsynlegt við pastagerð svo vel takist til. Það má þó rúlla deigið út með kefli en það er seinlegt. Kannski á einhver vinur eða kunningi vél sem hann vill lána til að prófa. Semolínahveiti fæst í Kost.

Látið deigið fara gegnum vélina nokkrum sinnum og stillið alltaf í minna bil á milli.

Setjið fyllinguna á með jöfnu millibili.

Koddarnir tilbúnir

Fylltir pastakoddar ( Ravioli)

Það er eins og að fara í jógatíma að laga sjálfur sitt eigið pasta. Það borgar sig að hafa tímann fyrir sér og anda ofan í maga allan tímann því þetta er talsvert tímafrekt. Það er þó fyrirhafnarinnar virði og gott að kúpla sig út úr daglegu stressi, einn sunnudag eða svo og njóta þess að gera svona hversdagslegan og undurgóðan pastarétt.

Ferskt pasta

500 g brauðhveiti

5 egg

semolina hveiti til að rúlla út með

Setjið hveiti og egg í matvinnsluvél og látið vélina ganga í 30 sekúndur. Hellið deiginu á borðið og hnoðið áfram í 2 mín. eða þangað til það er komið saman í fallega kúlu. Pakkið deiginu inn í plastfilmu og geymið í kæli í klukkutíma.

Skiptið deiginu í 4 parta. Rúllið einn part í einu út fyrst þykkt og svo þynnra og þynnra, notið semolinahveitið til að fletja út með. Setjið fyllingu með góðu millibili á 2 af lengjunum, klippið eða skerið á milli svo þið fáið ferninga. Bleytið með vatni í kringum fyllinguna. Skerið ferninga úr deiginu sem ekki er með fyllingu og látið ferning af deigi ofan á fyllinguna. Þéttið með fingrum í kring um fyllinguna. Setjið deigkoddana á ofnplötu og stráið ríkulega af semolínahveiti á milli koddana. Sjóðið deigkoddana í ríkulegu magni af saltvatni í 4-6 mín.

Það er mjög gott að borða koddana með bræddu smjöri með ferskri salvíu út í og að sjálfsögðu parmaosti.

Fylling í Ravioli (pastakoddar)

300 g kotasæla

2 msk. ólífuolía

80-100 g parmaostur, rifinn

hnefafylli af basil, saxað

1/2 tsk. oreganó

1/4 tsk. salvía

salt og pipar

Blandið öllu saman og notið til að fylla pastakoddana.

Grillaður kræklingur

Ferskur kræklingur er mikið lostæti og er nú farinn að fást hér á landi. Hann kemur frá Breiðafirði og fæst í Frú Laugu. Annarstaðar á blogginu er uppskrift að hvítvínssoðnum krækling en hér er hann soðinn og grillaður. Eldaður á þennan hátt er hann flottur sem forréttur.

Grillaður kræklingur
forréttur fyrir 4

1 kg kræklingur
2 brauðsneiðar, allavega dagsgamlar svo auðveldara sé að tæta þær niður
2 hvítlauksgeirar, saxaðir smátt
2 msk. steinselja, söxuð
3 msk. olía

Skolið kræklinginn í ísköldu vatni. Sjóðið hann í potti með botnfylli af vatni í 3-4 mín. Hafið lokið á pottinum. Kræklingurinn er tilbúinn þegar skeljarnar hafa opnast. Hendið þeim sem opnast ekki. Fjarlægið annan skelhluta af hverri skel og raðið skeljunum með krækling í í ofnskúffu. Skerið skorpuna af brauðinu og tætið það smátt niður í skál. Blandið hvítlauk, steinselju og olíu saman við. Stillið ofninn á grill. Setjið smávegis af brauðblöndunni á hvern krækling. Grillið undir heitu grillinu í nokkrar mínútur eða þar til brauðblandan fer að taka lit. berið fram strax.

Súkkulaðimús.

Þessa súkkulaðimús hef ég gert fyrir familíuna mína á jólum frá því ég var unglingsstelpa. Hún heppnaðist nú misjafnlega fyrstu árin og var það aðallega af því að ég var klaufi að bræða súkkulaðið. Það þarf að passa að súkkulaðið sé ekki of heitt og bræða það í vatnsbaði á mjög lágum hita, það getur tekið allt að 15 mín. Ef það er of heitt klebrast það þegar eggjarauður fara út í og blandan verður eins og sement. Ef þetta er passað er þetta einföld og fljótleg súkkulaðimús og mjög góð.

Súkkulaðimús

fyrir 4-6

300 g gott súkkulaði

3 egg

1 peli rjómi, léttþeyttur

Bræðið súkkulaðið við vægan hita í vatnsbaði ( best) eða í örbylgjuofninum. Passið vel upp á að það sé ekki of heitt. Skiljið eggin í sundur og stífþeytið eggjahvíturnar. Takið súkkulaðið af hitanum, bætið eggjarauðum út í og hrærið þeim saman við. Bætið eggjahvítum varlega saman við súkkulaðiblönduna, fyrst smávegis og svo öllu. Blandið þeytta rjómanum varlega út í og hellið í falleg glös. Þeytið meira af rjóma rétt áður en þið berið eftirréttinn fram og setjið á toppin .

Girnilegur kjúklingur í sósu

Við erum með dellu fyrir kjúklingaréttuum í sósu á mínu heimili þessa dagana. Okkar skoðun er sú að janúar og febrúar séu mánuður fyrir "comfort food" . Við erum ekki alveg inni á þessari "hreinsun eftir allt jólaátið" enda borðuðum við dásamlegan, hollann og góðan íslenskan mat alla jólahátíðina og ætlum að halda áfram að borða hollann og góðan mat þetta árið og njóta hvers bita. Þessi paprikukjúlli er akkúrat svona kósí-matur, kjarnmikill og í djúsí sósu.

Kjúklingur i paprikusósu

fyrir 4-5

2 msk. smjör

1 msk. olía

6-7 kjúklingabitar, efri læri eru mjög góð í þennan rétt

25 g hveiti ( ca. 3 msk.)

2 msk. paprikuduft

4 -5 dl kjúklingasoð, best að nota tilbúið í fernu t.d. sem fæst í Kost, annars bara tening og vatn

2 msk. rifsberjahlaup

rifinn börkur af 1/2 sítrónu

smávegis þurrkað timian

nýmalaður pipar

sjávarsalt

1 dl sýrður rjómi eða 1 dl rjómi

Hitið ofninn í 180°C. eða 160 á blástur. Steikið kjúklingabitana á báðum hliðum í blöndu af smjöri og olíu, takið þá upp úr pottinum og geymið. Ef mikið kemur af fitu af kjúllanum er gott að hella mestu af fitunni í pottinum, en skilja eftir smávegis eða sem samsvarar 4 msk. Kraumið paprikuna í því sem er eftir af feiti í pottinum í 1/2 mín, bætið hveiti út í og sláið saman. Hellið soðinu út í smátt og smátt og hrærið í á meðan. Bætið rifsberjahlaupi og sítrónuberki út í og smakkið til með timian, salti og nýmöluðum pipar. Setjið kjúklingabitana út í, veltið þeim í sósunni og látið þetta malla í ofninum í 40-50 mín, takið út úr ofninum og hrærið sýrðum rjóma saman við. Gott að bera fram með brauði hýðishrísgrjónum eða kartöflumús.

Áramótabomban

Ég smakkaði þessa köku fyrst á gullfallegu tehúsi "Au Coeur Du Rohan" í París fyrir mörgum árum. Þetta tehús var staðsett í passage við Rue St. André des Arts í eldgömlu húsi og var allt í gamaldags ömmustíl, rósótt stell af ýmsum tegundum, borðdúkar úr blúndu niður í gólf og kúnnarnir konur á öllum aldri. Margir kúnnar voru líka eldri parísardömur klæddu sig upp til að fara á þetta tehús, þær voru margar skrautlegir karakterar. Kökurnar voru ótrúlega góðar á þessu tehúsi, þær stóðu á risastórum skenk upp við einn vegginn og voru hver annari girnilegri. Þarna náði ég í nokkrar nýjar hugmyndir, þurfti náttúrulega að fara oft og smakka mikið......

Svona karlottur eru vinsælar í Frakklandi því þær eru samsettar m.a. úr fingurkökum sem hægt er að kaupa tilbúnar (margir parísarbúar eiga ekki ofna í eldhúsunum og geta ekki bakað heima). Kakan er auðveld í samsetningu og hægt að gera hana daginn áður.

Karlotta með perum og súkkulaði

1 pk. fingurkökur (Ladyfingers)

1 ds. perur

2 box sýrður rjómi, hrærður út með 2 tsk. vanillusykri eða sykri og dropum

1 uppskrift góður súkkulaðibúðingur( heimalagaður er best)

Sigtið perurnar. Setjið súkkulaðibúðing á botninn svo auðveldara sé að raða kökunum með hliðunum. Bleytið fingurkökurnar í perusafa og raðið þeim meðfram hliðunum í hátt form. Best er að formið sé hátt og ekki mjög vítt. Setjið sýrðan rjóma, bleyttar fingurkökur og súkkulaðibúðing til skiptis í formið, endið á kökum. Geymið í kæli í a.b.k. 2 klst eða yfir nótt. Hvolfið á fallegan tertudisk og sigtið kakó yfir.

Ekta karlottuform fást í Kokku og Pipar og Salt.

Jólalegt rauðkál

Heimalagað rauðkál á lítið skylt við það sem er í krukkunum en það á svo sem við um flest það sem er lagað heima frá grunni. Það er mjög fallegt að strá granateplakjörnum ofan á rauðkálið til að gera það ennþá jólalegra.

Heimalagað rauðkál

1 rauðkálshaus, u.þ.bl. 800 g

2 msk smjör eða olía

1 tsk. sjávarsalt

nýmalaður pipar

4-5 negulnaglar

1 lítið lárviðarlauf

3-4 msk. rauðvínsedik eða annað gott edik

1/2 dl vatn

1/2 - 1 dl rauðvín, rauðrófusafi eða Ribenasaft

1-2 msk. púðursykur

Skerið rauðkálshausinn í 4 hluta og hreinsið stöngulinn í miðjunni frá, sneiðið fínt niður. Steikið rauðkálið í smjöri eða olíu í 4-6 mín. Bætið öllu út í og sjóðið með lok á pottinum í 20 - 30 mín. Bætið meira vatni í ef það fer að verða of þurrt. Geymist í viku í kæliskáp. Gott að hita aðeins áður en borið fram.

Jólin á næsta leyti

Hér er uppskrift að fyllingu í kalkún. Ég fékk þessa uppskrift hjá mömmu sem notaði alltaf þessa fyllingu í kalkúninn en uppskriftin er upprunalega úr bækling frá Pottagöldrum. Ég er búin að gera nokkrar tilraunir mað fyllingar en hefur alltaf fundist þessi einföld og mjög góð.

Kalkúnafylling

125 g smjör

2-3 laukar

1 grænt epli

100 g skinka

100 g beikon

1 stöngull af sellerí

1 stk fransbrauð

75 g furuhnetur

1/2 tsk. timian

1-2 msk. kalkúnakrydd

1/2 tsk. nýmalaður pipar

2 egg

4 msk. rauðvín, mjólk eða kalkúnasoð af innmatnum

innmaturinn af fuglinum og hálsinn eða 200-250 g kjúklingalifur, soðið í 20 mín

(soð notað í sósu og innmatur í fyllinguna)

salt eftir smekk

Saxið lauk, epli, skinku, beikon og sellerí smátt niður. Ristið furuhneturnar á heitri pönnu. Takið skorpuna af brauðinu og skerið brauðið í teninga. Bræðið smjörið og steikið laukinn þar til hann verður mjúkur. Bætið kryddi út í og látið brúnast smá stund saman. Blandið öllu saman við og bragðbætið með salti og pipar. Bætið soðnum smátt söxuðum innmat eða soðinni kjúklingalifur saman vuð. Setjið hluta inn í kalkúninn og afganfinn í form og bakið við meðalhita í klukkutíma.

Partýstemming !

Þessir snúðar eru fastir liðir í öllum smáréttaveislum á heimilinu. Fljótlegir að laga og ótrúlega góðir. Það má baka þá og frysta. Hita síðan upp í ofnskúffu í 130-140°C heitum ofni í 10-15 mín. Fílódeig eða blaðdeig er í miklu uppáhaldi hjá mér því það er svo fljótlegt og þægilegt að vinna með það. Gerði fílódeigsþátt í klúbbablað Gestgjafans á þessu ári þar sem má finna margar sniðugar hugmyndir.

Fílósnúðar

ca. 28-30 stk.

2-3 msk. olía

1 laukur, smátt saxaður

8-10 stilkar vorlaukur, saxaður

200-250 g ostur, rifinn má vera hvað sem er

1 krukka paprika í olíu, olían sigtuð frá og paprikan skorin í bita

2 msk. fersk steinselja

1 pakki fílódeig, afþýtt

50 - 60 g smjör

Hitið ofninn í 200°C eða 185°C á blástur. Steikið báðar tegundir af lauk í olíu á pönnu. setjið í skál og bætið ost, papriku og steinselju. Smakkið blönduna til með salti og pipar. Setjið 3 blöð af fílódeigi á borðið og smyrjið deigblöðin með smjöri á milli lagana. Breiðið helmingnun af fyllingunni á efsta lagið af deiginu. Rúllið deiginu upp með fyllingunni innan í, rúllið deiginu á lengri hliðinni. Skerið rúlluna í 14 - 16 bita, raðið þeim með sárið upp á bökunarplötu klædda með bökunarpappír. Farið eins að við önnur 3 blöðin. Setjið e.t.v. meira af osti ofan á hvern snúð. Bakið í miðjum ofni í 15 mín eða þar til snúðarnir eru orðnir gullnir og girnilegir.

Dásamleg fiskisúpa

Það er erfitt að gefa nákvæma uppskrift að fiskisúpu, jafnvel þessi uppskrift sem ég nota oft er aldrei eins þegar ég elda hana. Ég myndi kalla þetta grunnuppskrift sem má leika með. Það er upplagt að nota allskonar fisk, eða það sem er á tilboði hjá fisksalanum í hvert skipti, Keila eða Langa er oft á góðu verði hjá mínum fisksala. Kryddið er líka smekksatriði, sumir vilja hafa súpuna sterka og aðrir milda. En það er gott að eiga góða uppskrift að fiskisúpu í handraðanum, þessi sómir sér vel til að bjóða gestum í.

Fiskisúpa

fyrir 6

4 msk. olía

2 laukar, smátt saxaðir

6 hvítlauksgeirar, saxaðir

2 sellerístönglar, smátt saxaðir

1 stór gulrót , smátt söxuð

1 lítill blaðlaukur, saxaður

1/2 -1 tsk. Szechuan pipar með chili og engifer (Jamie Oliver má sleppa)

1/2 -1 tsk. paprika

1-2 tsk. karrý

1 tsk. timian

nokkrir saffranþræðir (má sleppa)

1 dós niðursoðnir tómatar, saxaðir, Cirio finnst mér bestir

1 1/2 dl hvítvín

safi úr 1 appelsínu

safi úr 1 sítrónu

12 dl vatn

2 fiskiteninga

800 g fiskur í bitum

2-3 msk. steinselja

400 g hörpudiskur og humar eða risarækjur

1 dl rjómi

Steikið laukinn og hvítlaukinn í olíunni þar til hann fer að verða glær. Bætið öllu grænmetinu út í og steikið áfram í nokkrar mínútur þar til allt er mjúkt og ilmandi. Bætið kryddi út í og steikið með smástund. Hellið tómötum ásamt safanum í dósinni, hvítvíni, sítrussafa, vatni og fiskiteningum út í og látið allt sjóða rólega í 20 mín. Smakkið nú til og bætið í sem ykkur finnst þurfa, krydd, salt og pipar eða jafnvel teskeið að hlynsírópi ef hún er of súr. Bætið fisk og steinselju út í og sjóðið þar til fiskur er næstum soðinn. Bætið þá hörpudisk og humar eða rækjum í ásamt rjóma og sjóðið smá stund, athugið að hörpudiskurinn má ekki sjóða of lengi. Berið fram með góðu brauði.

"Arros Con Pollo" Hrísgrjón með kjúkling

Ég elska svona mat, svona virkilegan kósímat. Minn veikleiki er Risottó og þetta er ekki ósvipaður réttur. Ég hef notað þessa uppskrift þegar ég hef gert Paellu en haft færri kjúklingabita. Þetta er í raun mjög svipað Paellu nema þá bætið maður fisk og skelfisk með. Spánska nafnið á réttinum er bara dásamlegt, borið fram "arros kon pojo" með áherslu á r-in.

"Arros Con Pollo" Hrísgrjón með kjúkling

fyrir 4-6

Í þessum spánska rétti er gott að nota stóra og djúpa pönnu. Ég hef eldar þennan rétt alloft og stundum er eins og vökvamagnið sé og mikið en stundum passlegt. Ég held að þetta sé af því að kjúklingurinn er með mismikið vökvamagn sem skilar sér í grjónin við suðu ( salt og sykursprautað) Mér finnst þó betra að hafa meina en minna af vatni og láta rjúka af pönnunni án þess að hafa lok í restina af suðutímanum.

8 -10 kjúklingabitar, ég nota oftast efri læri

3 msk. olía

1 dl hveiti

salt og pipar

1 laukur, saxaður

2-3 hvítlauksrif söxuð

5 dl Aborio hrísgrjón, þessi stuttu

1 tsk. paprika

1/4 tsk chiliflögur (má sleppa)

1/4 tsk. saffran (má sleppa)

7 1/2 dl vatn

1 kjúklingasoðteningur

1 dós tómatar, saxaðir

1 msk. tómatpúra (má sleppa)

Veltið kjúklingabitunum upp úr hveiti og brúnið þá á báðum hliðum. Ég krydda þá oft með einhverju eins og papriku eða chili eða góðu kjúklingakryddi, bara einhverju sem ég á í skúffunni. Setjið bitana á disk og geymið. Fjarlægið fituna af pönnunni en skiljið 2-3 msk eftir til að steikja laukinn upp úr. Steikið laukinn þar til hann fer að verða gullinn, bætið hvítlauk út í og steikið aðeins áfram. Bætið hrísgrjónum út í ásamt kryddi og steikið í 2-4 mín. Hellið nú vatninu , kjúklingasoðteningnum, tómötum ásamt safanum úr dósinni og tómatpúrrunni á pönnuna, hrærið allt vel saman, saltið og piprið. Raðið kjúklingabitunum ofan á, setjið lok eða álpappír ofan á pönnuna og látið þetta malla við meðalhita í 20-25 mín. Þið getið smakkar grjónin og ef þau eru með harðan kjarna þurfa þau að malla lengur. Takið lokið af og ef enn er mikill vökvi í pottinum er gott að látið rjúka úr honum í 5 mín. Ef þið viljið fá svolítið grillaða skorpu á kjúllan er sniðugt að setja pönnuna aðeins undir heitt grill, ég geri það stundum.

Frábærar í frystinn

Þessar grófu bollur eru góðar að grípa í í nestispakkann. Þær eru hollar og treftaríkar og þiðna á 10 mínútum á eldhúsborðinu á meðan maður er að taka sig til í vinnu eða skóla.

Hollar bollur

ca. 14 stk.

5 dl volgt vatn

2 tsk. þurrger

1 tsk. salt

1-2 tsk. hlynsíróp eða hrásykur

600 g gróft mjöl, t.d. blanda af grófu og fínu spelti eða fínt spelt og heilhveiti

1 dl graskersfræ

1 dl sólblómafræ

Setjið allt í hrærivélarskál og hnoðið með hnoðaranum í 5-8 mín. Það getur verið mimunandi hvað deigið er blautt eftir því hvaða mjöltegundir þið notið en deigið á að vera seigt og klístrað. bætið aðeins við af mjöli ef það er of lint. Setjið plastfilmu yfir skálina og geymið á hlýjum stað í klukkutíma eða yfir nótt í ísskáp. Setjið bökunarpappír á 2 ofnplötur og mótið bollur með því að setja kúfulla matskeið af deigi með góðu millibili á plöturnar, um 9 bollur á hverja plötu. Hitið ofninn í 230°C eða 210°C á blástur. Látið bollurnar hefast á meðan ofninn er að hitna, aðeins lengur ef þið hafið látið deigið hefast fyrst í ísskáp.

Bakið síðan bollurnar í 20 mín. Frábærar í frystinn.

Kjúklingaréttur leikarans Bob Hoskins

Kjúklingaréttir eru vinsælir á heimilinu. Hér er uppskrift að einum slíkum sem ég fékk hjá vinkonu minni, Guðný Þórarinsdóttur prentsmið. Hún er mikil gúrmekona og eldar mjög góðan mat. Hún sá um þátt í Gestgjafanum þar sem hún var með kjúklingarétti og þessi var einn af þeim. Þetta er mikill kósímatur, allt í einum potti, meiriháttar gott.

Bob Hoskins Kjúklingaréttur

fyrir 4

1 heill hvítlaukur

1 msk. Maldonsalt

1 stór kjúklingur, hlutaður niður eða samsvarandi magn af kjúklingabitum

2 msk. olía

12 meðalstórar kartöflur, skornar í 4 bita og forsoðnar í 10 mín

4 stórir tómatar, skornir í bita

2 dl góðar svartar ólífur (fást í Tyrknesku búðinni í Síðumúla)

1 msk. nýmalaður svartur pipar

nokkrar greinar ferskt rósmarin eða 2-3 tsk. þurrkað

3 msk ólífuolía

Hitið ofninn í 190°. Hlutið hvítlaukinn niður, hann á að vera í hýðinu, og setjið salt yfir hann á meðan annað er tekið til í réttinn. Brúnið kjúklingabitana fallega í olíu. Setjið kartöflur, kjúkling, ólífur, tómata og hvítlauksrif lagskipt í ofnfast fat eða pott. Hellið ólífuolíu yfir allt og stráið rósmarin yfir. Setjið lok eða álpappír yfir pottinn og bakið þetta í 30 mín. Takið lokið af og bakið áfram í 10-15 mín í viðbót.

Enskar skonsur á morgunverðarborðið

Þær bráðna í munninum þessar ensku skonsur. Ég smakkaði þær fyrst hjá syni mínum, sem er áhugasamur bakari, og mér fannst þær frábærar. Hann skoðar oft vefsíðu sem heitir joy of baking. Þar er mikið af góðum uppskriftum og kennslumyndböndum meðal annars af því hvernig á að gera þessar skonsur. Lykilatriði er að leyfa smjörinu í þeim að verða svolítið grófkornótt ekki blanda þar til það verður mjölkennt og líka að hnoða þær ekki of mikið því þá missa þær léttleikann og verða seigar.

Enskar skonsur (örlítið breytt útgáfa frá vefsíðunni)

260 g hveiti

40-50 g sykur

2 tsk. lyftiduft

80 g smjör, kalt, í litlum teningum

1 egg

1 tsk. vanilludropar

1/2 dl rjómi

3/4 dl mjólk

mjólk til að pensla skonsurnar með

Hitið ofninn í 190°C, 175°C á blástur. Setjið hveiti, sykur og lyftiduft í matvinnsluvél, látið vélina ganga í 1/2 -1 mín til að allt blandist saman. Setjið smjör út í og látið vélina ganga þar til smjörið hefur blandast vel saman við en þó þannig að það sé á stærð við smáar baunir, setjið blönduna í djúpa skál. Blandið eggi, rjóma, mjólk og vanilludropum saman í aðra skál. Hellið eggja/mjólkurblöndunni út í þurrefnin og blandið öllu saman með sleikju þar til deigið er samlagað. Hnoðið létt saman, ekki hnoða of mikið, og fletjið deigið létt út með flötum lófum þannig að það verði 1 1/2 sm að þykkt, notið hveiti til að deigið festist ekki við borðið. Stingið úr kringlóttar skonsur með formi eða glasi sem er um 5 cm í þvermál, hnoðið afskurðinn aftur og mótið skonsur úr öllu deiginu. Raðið skonsunum á bökunarpappír á ofnplötu, penslið ofan á með mjólk. Bakið í 15 -18 mín í miðjum ofni. Kælið á rist. Bestar nýbakaðar með léttum rjómaosti eða rjóma og sultu.

Besta sítrónukakan

Sítrónukökur eru í miklu uppáhaldi hjá nokkrum fjölskyldumeðlimum á okkar heimili og eru bakaðar reglulega. Þessi uppskrift er nokkuð gömul og kemur upprunalega frá meistara Raymond Blanc. Ég hef alltaf verið mikill aðdáandi hans. Hann er sjálflærður matreiðslumaður, segist samt hafa lært mest af mömmu sinni sem hann segir vera frábæran kokk. Raymond Blanc hefur í áraraðir rekið frábæran veitingastað í Bretlandi sem heitir Le Manoir Aux Quat'Saison

Ég hef ekki enn borðað hjá honum, á það vonandi eftir.

Sítrónukaka

10 -12 sneiðar
2 1/2 sítrónur, börkur af öllum og safi af einni
5 egg
350 g sykur
smá salt
1 1/2 dl rjómi
270 g hveiti
2 tsk lyftiduft
100 g smjör, brætt og kælt aðeins

glassúr:
safi af 1/2 sítrónu
100 g flórsykur

Hitið ofninn í 180°C, 165 á blástur. Setjið sítrónubörk, egg og sykur í skál og þeytið saman þar til létt og loftkennt, hellið sítrónuberki út í smám saman í restina. Sigtið hveiti og lyftiduft saman. Bætið rjóma, hveiti og lyftidufti út í og blandið saman við með sleikju. Bætið smjöri út í síðast í mjórri bunu og blandið saman við. Smyrjið eða setjið bökunarpappír í 30 cm langt jólakökuform. Hellið deiginu í formið og bakið þetta í miðjum ofni í 50-55 mín. Notið prjón til að athuga hvort kakan er bökuð. Losið kökuna varlega úr forminu og kælið hana á rist. Hrærið glassúrinn saman með því að hræra sítrónusafa og flórsykur saman. Smyrjið glassúrnum yfir kökuna. Skreytið e.t.v. með sítrónu eða límónuberki.

Frönsk og frábær

Franska lauksúpan á sér langa sögu. Uppruni hennar er sennilega frá tímum Rómverja. Þeir suðu lauk, sem allir gátu ræktað, og vatn saman og þótti þetta vera mettandi fátækramannamatur. Frakkar þróuðu síðan snemma uppskriftina og bættu brauði og glóðuðum osti ofan á og varð þetta vinsæll matur þar í landi. Súpan komst síðan mjög í tísku í Ameríku um 1960 þegar franska matarmenningin varð vinsæl vestra og hefur Julia Child átt þar stóran þátt.

Þetta er sígild súpa, algjör drottning að mínu mati en eins góð og hráefnið sem fer í hana ( eins og allt annað). Gott soð, smá púrtari, vel af pipar og góður ostur ofan á eins og t.d. Ísbúi gerir þessa súpu vel hæfa í matarboðið.

Frönsk lauksúpa

fyrir 6

1 - 1 1/2 kg laukur

3-4 hvítlauksrif, söxuð

80 - 100 g smjör

slatti nýmalaður pipar

40 g hveiti

1 líter gott nautasoð ( fæst t.d. í Kost) má líka nota grænmetissoð

4-5 dl vatn

1-1 1/2 dl púrtvín

sjávarsalt

gott snittubrauð eða Ciabattabrauð

sterkur ostur

Afhýðið laukunn og skerið hann í tvennt, skerið hvern helming í tvo hluta og sneiðið hann niður. Þetta er mikið af lauk og mikið táraflóð. Steikið laukinn og hvítlaukinn í smjörinu í um 15 mín eða þar til laukurinn er glær og aðeins farin að taka lit. Piprið vel í pottinn og látið piparinn steikjast aðeins með, mér finnst piparinn njóta sín vel með þessari aðferð. Stráið hveitinu yfir laukinn og hrærið honum saman við með sleif. Hellið öllum vökva sem á að fara í súpuna út í, fyrst smávegis og svo öllu til að hveitið fari ekki í kekki. Sjóðið súpuna í 30 mín við meðalhita, smakkið til með pipar og sjávarsalti.

Hitið ofninn á grill. Skerið brauðið niður í teninga ( það er auðveldara að borða súpuna þannig) eða sneiðar og stráið rifnum osti yfir. Grillið brauðið þar til það er gullið og girnilegt. Hellið súpunni í skálar og setjið grillað ostabrauð í hverja súpuskál. Berið fram strax.

Ódýr og fljótlegur

Er það ekki það sem allir vilja kunna, að gera ódýran mat sem er fljótlegt að elda og bragðast eins og besti veislumatur. Þetta er sá réttur á okkar heimili. Allt í ofnskúffu, tími til að kósa sig, sinna skylduverkum.............. eða skreppa í göngutúr og finna matarilminn koma á móti þér þegar inn er komið.

Fljótlegur kjúklingaréttur

3 bökunarkartöflur

2 laukar

2-3 hvítlauksrif

1 sítróna í sneiðum (má sleppa)

3 msk olía

8-10 bitar af kjúkling, gott að nota efri læri

salt og nýmalaður pipar

gott krydd eftir smekk

Hitið ofninn í 200°C, 180 á blástur. Penslið ofnskúffu með olíu. Skerið kartöflur í sneiðar og raðið þeim í ofnsúffuna svo þær þeki hana. Skerið laukinn í skífur og raðið ofan á kartöflurnar. Raðið sítrónum ofan á ef þið notið þær. Saltið og piprið. Raðið kjúklingabitunum ofan á grænmetið, penslið aðeins með olíu, líka lauk og kartöflur þar sem kjúklingurinn er ekki ofan á. Kryddið kjúklinginn eftir smekk. Bakið þetta í ofninum í um það bil 30-40 mín eða þar til kjúklingurinn er fallega brasaður og kartöflurnar farnar að taka lit.

Gott nesti !

Vefjur með reyktum laxi

Nesti er ofarlega í huga þessa dagana þegar berjaferðir og sveppaferðir eru í algleymingi. Ikea er með ýmislegt spennandi í matardeildinni, þar kaupi ég þetta þunna flatbrauð með smá anisbragði sem er góð tilbreyting frá venjulegu brauði. Ég smyr það með rjómaosti, set nokkrar sneiðar af reyktum laxi ofan á, smá klettakál, vel af pipar og ferskri piparrót og rúlla upp. Meiriháttar gott.

Sunnudagsmorgun

Morgunmatur á sunnudegi

Sunnudagsmorgnar eru alltaf sérstakir og gaman að útbúa eitthvað gott og dekra svolítið við sig. Þetta er það sem mér finnst ómótstæðilegt. Steiktir brauðteningar (gott að nota gróft brauð) með smá hvítlauk og steinselju, góð parmaskinka, 4 mínútna egg sem leka yfir diskinn og steiktir konfekt tómatar.....Mmmmm...........